من روائع الشاعر عبدالله بن راشد ال رمضان ( رحمه الله )

[راعي الصفرا]

السلام عليكم ورحمة الله
اول شي لقب راعي الصفرا عند الزعوب هو راعي الصفرا معثم :) هو ( عثمان بن سلامه ) عسى الله ان يغفرله ويشفيه
والشي الثاني يوم دشيت اسجل هالاسم لقيته مستخدم من قبل ولو اعرف منهو اللي مسجله كان جيته وحبيت خشمه :)
الشي الثالث الله يعطيكم العافيه على هالموقع الطيب والمشاركات الطيبه واتمنى انكم تقبلون هالمشاركه البسيطه من اخوكم (ابو عثمان) راعي الصفرى
--
هذي القصيده الرائعه من روائع الشاعر عبدالله بن راشد ال رمضان (رحمه الله) موجهها لأبنه خالد - معبره عن مافي نفسه وكتبها في اواخر السبعينيات .
--------------------------------------------
[poem font="Simplified Arabic,4,darkblue,bo ld,normal" bkcolor="sienna" bkimage="backgrounds/23.gif" border="solid,4,dark blue" type=2 line=0 align=center use=sp num="0,black"]
القلب ياخالد ضرب فيه دولاب = دولاب هاجوس همومه مراديف
والبارحه جنبني النوم جناب = كلن رقد ودموع عيني ذواريف
اعوي كما سرحان واجيب ماجاب = وألاحي الورقا بروس المشاريف
واليا نشدني داله ويش الاسباب = اقول مالك من سبيلي مصاريف
اشوف لي دنيا تقلب تقلاب = بوّاقة بعهودها والمحاليف
دنيا ليا اقفت تسقي المر بأكواب = وان اقبلت مثل العسل والنواشيف
عقب الطرب خلتني اذهب تذيهاب = ينسف علي الموج من ساحل السيف
كني حبيس سكرو دونه الباب = في حبس روم ماتعرف المعاريف
أتوق توق موحّش فوق مرقاب = تذكر المعبار وسهيل قد شيف
ناض وتنهّض واطرف الريش عياب = ووقع وناظر في حياته تكاسيف
قمت اتلزا خابث في ماطاب = تقفي وتقبل بي هموم وعواصيف
شفنا سهيل وغرّب القيض بحساب = والصيد هبت له هبوب النفانيف
لا والله الا صار للبدو جذاب = جاهم من الوسم المبكر طواويف
طووا عصير وشلّعو باقي الاطناب = وحبالهم تلوى بروس العصاريف
وغدالهم مع طلعة الفجر ضبضاب = وأقفو وتاليهم على العد ماشيف
ماكنهم دقو على العد منساب = مرحانهم تنسف عليها النواسيف
وصبرت لي صبر يشيب بالاشباب = وايامنا راحت علينا تزاليف
ابديت ماكنيت واحضرت ماغاب = والجم جابتها الدلي والغواريف
ياربعنا دنّو لنا خضع الارقاب = قطم الفخوذ وكاملات التواصيف
نجايب يعطن بنا كل ملهاب = تسبق مراويح القطا والشواحيف
يلفن بنا من ديرة اجناب لأصحاب = قلبي لهم وقلوبهم لي مواليف
ترثة زعوب نجمهم مابعد غاب = لطامة العايل بشلف مراهيف
ربعي (هل الحيزا ) اليا كلّح الناب = وغوانم عند الركايب نواتيف
ياماحلا شداتنا في بعض الانواب = لامن جذبنا برق وسم على صيف
الطرش يجهم والمظاهير هرّاب = والطير يطرد والسلف له غطاريف
ترعى بنا رعي الطنف كل حنزاب = وترعى بنا شقح البكار المشاعيف
بدو على عاداتنا جابنا جاب = على سلوم اجدادنا كيفنا كيف[/poem]


وسلامتكم وعسى الله ان يغفر للشاعر ويسكنه فسيح جناته وجميع اموات المسلمين