مساجله بين علي غنيم الزعبي & محمد بن مبارك بن وافي الزعبي

[علي بن مديبغ]

السلام عليكم ورحمة الله وبركاته


هاذي مساجله شعريه بيني وبين الاخ محمد بن وافي مظمونها عن الوقت الحالي وتغير الحال بسبب المال



يا راكبين العيس بالله تكفون‌‌‌‌‌‌@@ودو لبن وافي خلاصة كلامي

الحال يا محمد كما حال مديون‌‌@@او حال من ربعه غدوله خصامي

الناس صاحيها غدا كنّــه مجنون@@جمع الدراهم من حلال وحرامي

اللاش يجمع بالدنانير مليون‌‌@@يصير اسمه من كبار الاسامي

والقرم لو يبذل بجهده يقولون@@خبلٍ ولا يرّكَـبه حق وملامي

الناس صدق اجناس وكلٍ على لون@@والله خلق ثُــمن فرق بالانامي

لاكَــن ذ الدنيا بها ناس يمشون@@على خطأ تمشي بليا نظامي

ما اقول انا من مشية الناس مغبون@@ولاني مع هاذا وهاذا محامي

لاكَـن هالعينين من ما يشوفون@@ماهي بما تنظر على ما يرامي

تقلب الاوقات ليس بمأمون‌@@ ياما وطى هالوقت عالي المقامي

اقرب مثل للكبر والمال قارون@@خسف به المولى وملكه حطامي

اهل النُــهى من ما سلف قبل يدرون@@ولا الجهل على هله كالظلامي

لابد من غفلاتها الناس يصحون@@لكن عسى يصحون قبل الندامي

الوقت مثل السيف لا صار مسنون@@كم واحدٍ يمسي من السيف دامي

مشكاي رجلٍ من رجالٍ يحلون@@عسر الكُـرب دخيلهم ما يظامي

زعوب لا صاح المنادي يشيشون@@للفزعه وصوت التفك بالعسامي

من لابةٍ ما تقبل الذل والهون@@ يردون حوض الموت ورد الظوامي


تعليقات على طرف لتوضيح بعض المفردات

العيس = الابل باللغه الفصحى
النُـهى= العقل
يدرون مثل قولة فلان يداري الشي هاذا = يحرصون
سلف = شيء مضى
التفك = الذخيره او الفشق باللغه العاميه


وسلامتكم


ورد ابن وافي يقول



يا اهل الركاب اليا نويتو تمدون@@ردو لبن عمي جزيل السلامي

حي الجواب اللي منظم وموزن@@ ماهي سواليفٍ تجيب المنامي

وانا على الردات ماني بمسجون@@مساجلات الشعر غاية مرامي

الراس ما كيّـف بشيشه وغليون@@البن الاشقر مشربي والطعامي

يا مسندي لا تشتكي دامني عون@@اخذ الخبر دام الفشق في حزامي

إن ما عصبت الراس لمناطح الكون@@ماني وانا محمد خوالي عمامي

الناس بأمر النفس وبليس ملعون@@ومن لا قفل بابه يجيه الحرامي

خلك مع الطيب كما العين والنون@@ارفع مقامك يا عزيز المقامي

واليا بديت السد والسد مكنون@@ابده على رجالٍ كرامٍ حشامي

واليا عطوك السر والسر مدفون@@احفظه ما بين اللحم والعظامي

ايامنا تصفى ولا بدها تخون@@مثل القمر نوبٍ هلال وتمامي

عزاه يا وقتن به البوم فرعون@@والحر في صيده قذاه الحمامي

لاشك رزقي عند من طوع الكون@@إن قمت له ولا مسكني وقامي

الظيف لا جاني مكرم وممنون@@والجود فالماجود طبع الكرامي

خابرك تَـعلم ما تَـعلّـم من الدون@@يا شوق من خده زهاه الوشامي

ربعك ليا حمي الوغى صارو جنون@@أعقلهم اللي دون ربعه يحامي

آلاد زعبٍ بالمعارك يظدون@@ اخير من عقبه سامٍ وحامي


وهنا بعد توظيح بعد

الركاب = الابل
قذاه = ازعجه
الدون = الشيء الدنيء
آلاد = اولاد
سامٍ وحامي = ابناء آدم عليه السلام وهم اصل البشريه واجداد البشر



وسلامتكم وسامحونا على القصور

[العميد]

صح السانكم وتسلمون

[علي بن مديبغ]

حياك الله يا العميد


وصح بدنك


وهاذي الساعه المباركه اللي نشوفك طال عمرك

[طرجم الزعبي]

صح لسانك ويعطيكم العافيه.......

[علي بن مديبغ]

حياك الله يا طرجم

وصح بدنك

ويعطيك العافيه على الزياره الغاليه علينا



ولاهنت

[مبارك الزعبي]

صح لسانك يابو غنيم .... ولاهنت


وصح لسان الشاعر محمد مبارك


ابدعتو يا شعرائنا ...


الى الامام ...

[علي بن مديبغ]

حياك الله يا ابو فالح


وصح بدنك

ولا هنت على الطله الغاليه علينا

[حمد السلمي]

صح الله لسانكم والله يوفقكم ياهل الحيزا يامكرمين الجار

[ابوهلا]

مشالله

قصيده فاخره ورد فخم ومستوى ... يليق بهذه ... الأسماء



لاكَـن هالعينين من ما يشوفون *** ماهي بما تنظر على ما يرامي


لله درّك بيت يترجم مايجول بـــ خلجات الرجال


لابد من غفلاتها الناس يصحون *** لكن عسى يصحون قبل الندامي


اللهم اميـــــن



ابدعت يا بو غنيم





حي الجواب اللي منظم وموزن*** ماهي سواليفٍ تجيب المنامي


ياسلام عليك يبن وافي


إن ما عصبت الراس لمناطح الكون *** ماني وانا محمد خوالي عمامي


كفو


الناس بأمر النفس وبليس ملعون *** ومن لا قفل بابه يجيه الحرامي


حكيم


آلاد زعبٍ بالمعارك يظدون *** اخير من عقبه سامٍ وحامي



ياشيــخ رح الله يوفقك


صح لسانكم مليون ابداع وجزاله







لاعدمتكم






.

[علي بن مديبغ]

حياك الله يا السلمي


وحياك الله يا ابو هلا


ولا هنتو على الردود الطيبه