[SHaaLe7]

السلام عليكم وصبحكم الله بالخير

عندي مشاركه بسيطه

وأتمنى تنال أعجابكم





الشعـر لـه فاتـل وناقـض وفـاروق ** والسـوق لـه سايـم وشـاري وبايـع

واللي ربح ببضاعتـه يمـدح السـوق ** والنـاس تطلـب نـادرات البضـايـع

يا مدوّر الطيـب تخيّـر علـى الـذوق ** وأحفظ معك مـن قـول فـارس ودايـع

لو كـان بالإرشـاد والنصـح مسبـوق ** ذكـرى لعـل لهـا تــرق السمايع

جواهرٍ معهـا شـذى المسـك مرفـوق ** ومعهـا التجـارب مثبتـه بالوقـايـع

واللي لبس من جوهر المرجلـه طـوق ** مثلـي مجـرّب والتـجـارب نفايع

سافرت لي طرقه وطبيـت لـي سـوق ** وخاويت فـي دربـي جميـع النزايـع

والله خلـق فالنـاس ميـزات وفـروق ** النـاس شتـى بالشـيـم والطبايع

أحـدٍ علـى مبـدأ ولـه نظـرةٍ فـوق ** وأحـدٍ كمـا ثلـجٍ علـى القـاع مايـع

ولاني وكيـل آدم علـى كـل مخلـوق ** لكـن أشـوف بخلـق ربـي نـوايـع

أشفق على الطيب ولـي رفقتـه شـوق ** غريـب وإلا مـن قـريـب الجمـايـع

الطيب وأهل الطيب عاشـق ومعشـوق ** والطيـب لـه مبـدأ وحكـم وشرايـع

والمرجله وهبـه مـن الـرب ووفـوق ** والديـن رأس المرجـلـه والطمايع

والرزق من ربي وله فـرض وحقـوق ** ومن يطلب أرزاقه مـن الخلـق ضايـع

والأخـذ بالأسبـاب ثابـت ومـوثـوق ** وتوفيـق ربـي هـو خيـار الـذرايـع

ولا كـل مطـرودٍ كمـا قيـل ملحـوق ** قـولٍ مبالـغ فيـه لـو كـان شايع

إن ما جلبهـا والـي العـرش برفـوق ** كثـر المطـارد مـا يحـوش النفايع

من يحسن النيه مع النــاس مـرزوق ** ومـن يتقـي ربـه دروبـه سنايع

والكـذب ثـوبٍ مايجمَّـل ومشـقـوق ** ولا ينرفـي شقـه بكـثـر الرقـايـع

ومن لا يحـط أسـرار قلبـه بصنـدوق ** ويجـوَّد المفتـاح عـن كـل صـايـع

يفتح علـى نفسـه مداخـل وخـازوق ** وقناصـة الفرصـه تـزيـد الجـلايـع

ومن يقـرب الأنـذال لا يامـن البـوق ** النـذل خايـن مـا يصـون الودايع

عقـرب ثـرى وإلا كمـا نـاب زاروق ** لا صـادف الـغـرات للـسـم زايــع

وأحـذر تـرى النمـام للشـر ناتـوق ** دايــم يـقـرَّب للـشـرار الـولايـع

من المكـارم خـارب القصـد مسلـوق ** وعقلـه لنزغـات الشياطيـن طـايـع

وترى الردي شمعٍ على الحيـط ملـزوق ** لا أونس حميم الشمـس جـاك متمايـع

أحـذف ردي المعرفـة حـذف خملـوق ** لا تنـخـدع بالزبـرقـه واللمايع

عليـك بالطيـب ليـا صـرت مزنـوق ** الـلـي فعـولـه كلبـوهـا روايــع

يشيل عنـك مـن الصعيبـات طـاروق ** ولا يلحـق المنـه جميـل الصنـايـع

لامن عن الواجـب هبـا كـل مزلـوق ** يقـوم بالـواجـب بعـيـد الرمـايـع

والشارب اللي ساعة الضيـق محلـوق ** وقت الرخاء ما أحـدٍ يبـي لـه فزايـع

خله ولو شفته علـى الوجـه مصفـوق ** ولا تستشـيـر مجالسـيـن الربـايـع

وإن كان في صدرك قنا الوقت مـزروق ** خلـك علـى الشـده قـوي البتـايـع

واضرب على الكايد ولا يلحقـك عـوق ** وأطلـع سنـود وخيـر ربـك طلايـع

والشمس لو غابت يجي صبح وشـروق ** والحق لـه صيـتٍ مـع النـاس ذايـع

يقدم عزيز الساس لـو كـان مفهـوق ** ويأخـذ عظيمـات المـراجـل قـلايـع

وأبليس أخـو مـره مربَّـط ومفلـوق ** وفـي كـل يـوم يـزود حـر ولقايـع

نركـي علـى كبـده مراقيـع وحـروق ** وعـروق قلبـه مـن وحمنـا مزايـع

وصلوا على الهادي عدد ما أرمش الموق ** وعسى لنـا مـن جـود ربـي شفايـع

















فارس العصيمي ،،،