السلام عليكم ورحمة الله وبركاته

يا الله يلي كلنا مرتجينه ***** يا واحدٍ ما خاب منهو ترجاه
نسألك ما غيرك أحد سائلينه ***** يا الله يارب المخاليق يا الله
عبدك ياربي رافع لك يدينه ***** يدعيك من قلبه ومخلص لك دعاه
حزين ونفسه يا إلهي حزينه ***** على اللي في غفله فجعنا بفرقاه
ابو عبيد وينه اليوم وينه ***** الشاعر اللي خذ من البحر معناه
الشاعر اللي كلنا خابرينه ***** الوافي اللي نادر تشوف حلياه
فقيد شعر الرد ومتابعينه ***** شاعر مطير اللي سجاياه
ان اندفن فقلوبنا دافنينه ***** وأن مات ما ماتت مع الناس ذكراه
عبد الله ويا كثرهم فادينه ***** وياكثر دمعٍ في غيابه نثرناه
يا لله تلهمنا الصبر والسكينه ***** وتجعل ياربي جنة الخلد مثواه
يا رب تغفر له وي الله تعينه ***** في يوم ما للعبد يا كود مولاه
يا الله يلي كلنا مرتجينه ***** يا واحد ما خاب منهو ترجاه