قصـــــــــــــة و قصيـــــــــــدة

[مبارك الزعبي]

بـــــــسم الله الرحــــــمن الرحــــــــيم


الشاعر راشد بن حسن الجمعه الملقب ( ابن خر الذيب) كان يشتغل سوّاق في ارامكو وكانت انظمة ارامكو تمنع السائقين ان يشيلو الطرقيه اللي يوقفون السواقين ويطلبونهم توصيلهم على طريقهم .. والشاعر راشد الله يرحمه كان يخالف التعليمات وكل هذا حيا فيه ومرجله يوم من الايام أشرت له عجوز ومعها حمار (عزكم الله )قالت وصلني يا الأجودي قدام شوي قال ابشيلك بس الحمار .لا قالت له خلاص روح الله يستر عليك بيجي ابن خر الذيب ويشيلني انشاْ الله تقصد راشد العجمي .. قال لها يا خاله انا راشد ابن خر الذيب .. اركبي وابشري بالخير .. وقيل انه توفي عام 1986م وهو في نجران وكان شايل معه شخص موصله الى قرية في نجران وحصل عليهم حادث رحمه الله .. وله في ذلك ابيات جميلة منها:
لا لقيت اللي على السكه لحاله .. يلتفت ويقول وين الطيبيني
اوقف الموتر حيا وابغي الجماله .. يوم ولد اللاش وجهه مايليني
حالف ماخذ على الرجالي رياله .. بالثلاث محرم انها ماتجيني
والولد لاطاب طيبه من خواله .. وان تردى فعرف انه من الخايبيني

وسمع هذي الابيات رجل دوسري من وادي الدواسر .. فرد عليه ممتدح جاره ابن حسين الزعبي وقال :

يابن خر الذيب عندي لك مساله .. عندنا مثلك ربوع(ن) طيبيني
عندنا ابن حسين يفعل ماطراله .. يكعم العايل وهيف(ن) للسميني
كم جماعة(ن) شلهم من حر ماله .. لا لقــاهم بالـبلد متعـطــليـني
ضوهم ضوه ودلـــتهم دلالــــه .. شوف عيني واشهدوا يالحاضريني

وسلامتكم..

واللي اعرفه عن ابن حسين انه غانمي لكن ماعرف اسمه
واللي يعرف يفيدنا...


|4| واتمنى ان القصه اعجبتكم

مبـــارك بن وشــــمي الزعـــــبي

[الزعبية]

يعطيك العافية ... القصة ممتعة جداً ولا النخوة غريبة على عموم العرب :)

[راعي العوجا]

اخوي مبارك ..
مااعرف زعوب في وادي الدواسر ..
فربما يكون من الافلاج وهم هناك غوانم ..

[admin]

[بسم الله الرحمن الرحيم

اخوي مبارك
السلام عليكم ورحمة الله وبركاته
واسعد الله اوقاتكم بكل خير

وبيض الله وجهك على هالقصة والقصيده.
ونعم في الطيبين، لكن اللي يخدم الناس على سيارته
الخاصة غير.والنعم في كل أهل الطيب.

يتواجد من الزعوب في محافظة الافلاج.
حسب ما نعلم من معلومات متواضعه..اسر من ال عسل من
البشرا الاجاوده وينقسمون إلى قسمين قسم في مدينة ليلى
عاصمة الافلاج (جنوب الرياض ، على طريق الجنوب)
ويعرفون بال عبد الله ومنهم الشاعر الاستاذ عبد الله بن مسفر
بن عبد الله العسل الزعبي ويكتب بالفصحى .

اما القسم الثاني ما يعرفون بال حسين العسل ويقيمون
في مدينة الهدار بالافلاج..
ومن هم الشاعر المذكور اعلاه، وان شاء الله سوف
ابحث عن اسمه.

[مبارك الزعبي]

حياكم الله ويامرحبا ومسهلا باخواني الجار وراعي العوجا والزعبيه
ولاهنتوا على الطلة الجميله اللي تسعدني .. واتمنى لكم التوفيق وللجميع

[ابو تركي]

الاخ مبارك الزعبي



صبحك الله بالخير



فعلا هذي القصيده اللي سمعته وادورها

والحمدلله انك جبتها


تسلم الله لايهيينك

واضيف بيت لبن خر الذيب وهو :

اشرب الفنجال واكب البياله
******************** *طيب(ن) واحب سلم الطيبيني




اما بالنسبة لقصيدة الدوسري للزعبي

انا سمعة ان الزعبي اسمه عبدالله بن حسين


والله اعلم



وتسلم على نقلك لهذه القصيده النادره


مع تحيات اخوك ابو تركي

[مبارك الزعبي]

ولا يهينك .. يامرحبا بأبو تركي
انورت واسفرت بطلتك علينا
وحياك الله .. وبالتوفيق

[المتروكي]

مساكم الله بالخير ..

ما قصرت يا مبارك علومك غانمة ..

القصيدة ذي قد سمعتها من شايبي .. ولو ان فيها اختلاف بسيط في الابيات بس تقريبا نفس المعنى .. انا بذكرها للمعلوميه فقط ..

يابن خرالذيب عندي لك رساله && عندنا مثـلك ربـوع(ن) طـيـبـيـني
عندنا ابن حسين يفعل ماطراله && يركب العبري وهيف(ن) للسميني
كم نقله خبرة(ن) من حر ماله && لا لــقــاهم بـــالبــلــد متـعطـلـيـني
نجـرهـم نـجـره و دلـتـه دلالـه && شوف عيني واشهدوا ياحاضريني

خبرة: جماعة من الناس

هذي قصيدة الدوسري لاعبها بجاره ابن حسين الزعبي .. بعد ان ذاع صيت راشد خر الذيب .. وذاعت قصيدته المشهورة والي عارضه اغلب الشعار عليها وخصوصا في البيت الاخير ..
قالها الدوسري لما شاف راشد يتفاخر بأنه يفعل الطيب ويذكره بأشعاره .. حب يبلغه ان الطيب ماهوب مقصور على احد .. وفيه ناس اطيب منه .. وواضح الفرق بين ابن حسين وراشد ان راشد ينقل على سيارة الشركه اما ابن حسين كان ينقل على سيارته الخاصه مثل ما قال الشاعر ( كم نقله خبرة(ن) من حر ماله ) ..

اتمنى اني اكون زدت معلوماتكم ولو بشيء بسيط ..
والله يقدرنا على خدمه هالموقع الي يشرفنا ويكون مكان نلتقى فيه مع عيال العم ..

لاهنتوا يا القروم ..

المتروكي ..

[راعي العوجا]

المتروكي ..
زدنا من سوالف شايبك الله يطول في عمره :):)

[المتروكي]

ابشر يا راعي العوجا ..
وابشروا يا باقي الاخوان ..
انشاءالله تقرون الي يرضيكم في الايام الجاية ..

[راعي العوجا]

بانتظارك يالطيب ..:)

[نادر]

والله لو يدري عما بقلبي
يزيد نبضه لا تقابلت وياك
مدري علامه يامبرك لعبي
قصدة يمشيني على ساق خطاك
ويا هلا والله فيك

[مبارك الزعبي]

حياك الله يا ليتهم يفهمونك..

وصح لسانك على البيتين :)

[ابوهلا]

اخونا مبارك الله يعطيك العافيه على هالقصه اللتي تحث على الطيب والمرجله وماقصرت

والقصه اللي حصلت للعجوز ونعم براشد لاكن ماهي له القصه اللي فيها العجوز ودابتها لرجل يقاله (عبيد بن بعيران الفهيدي المري ) ونعم بالطيبين كلهم

ولو ان مشاركتي متأخرة لاكن اذا حصلنا المعلومه الصحيحه مافيه بأس نشارك ولو كان متأخر ............ والله اعلم

وتقبل تحياتي
اخوك ابوهلااااااااااااااا ااااااا

[فهد بن سالم]

السلام عليكم ورحمة الله وبركاته

القصة الحقيقية هي كالتالي :

كان عبد الله بن حسين آل عسل من الاجاودة من الغوانم من زعب يسكن الرياض وعنده نقليات ( سيارات لواري ) تنقل بضائع للجنوب ، لنجران واليمن
وكانوا الناس ذلك الوقت في حالة فقر ماعندهم شي ، فالذين على طريق الجنوب مثل نجران ووادي الدواسر والأفلاج والخرج ، يقفون على الطريق ويؤشرون للسيارات المارة ليركبوا معها لوجهتهم ، سواء سيارات عبدالله بن حسين أوغيره ، وكان عبد الله بن حسين يركب الناس في سياراته بدون مقابل ، بل أن المسافرين معه يتقهوون معه من قهوته ويتزودون بزاده حتى يصلون وجهتهم ، وفي الرياض كان المسافرون للجنوب ينتظرون سيارات النقليات لتحمل بضائعها ويركبون معهم في الصنوق حتى يصلون .
وبالنسبة لعبد الله ابن حسين كان يرافق نقلياته إما يركب إحدى اللواري أو يرافق الحمله على ونيت له مع سواقه .
وفي إحدى المرات كان يركب في إحدى لواري ابن حسين مران بن قويد المساعره الدوسري شيخ الدواسر ، ومسعود بن عنبر المقابله الدوسري ، متجهين من الرياض لوادي الدواسر ، وكان المسافرون يغنون قصيدة ابن خر الذيب العجمي التي يقول فيها :
لين لقيت اللي على الرسته لحاله ***** واقف ويقول وين الطيبين
اوقف الموترله ابغي الجماله ***** طيبن واحب سلوم الطيبين
حالف ماخذ على الرجلي رياله ***** والثلاثة والله انها ماتجيني

وهي طويله ..........

فتحادث مران ابن قويد مع مسعود بن عنبر في أن الذي يستاهل المدح هو ابن حسين ، لان ابن خر الذيب ينقل الناس على سيارة شركة أرامكو حيث كان يعمل فيها بينما ابن حسين ينقل الناس على سياراته الخاصة وزيادة على ذلك ياكلون ويشربون من زاده طيلة الطريق .
فقالا القصيدة المشهورة على وزن قصيدة ابن خر الذيب ، ومنها :

يابن خرالذيب عندي لك رساله ***** عندنا مثـلك ربــــــوع طـيــبـيـني
عندنا ابن حسين يفعل ماطراله ***** يركب الرجلي وهيــف للسـميني
كم نقله له خبرة من حر مــاله ***** لا لــقــاهم بـــالبــلــد متـعطـلـيـني
ضوهم ضوه وكيفتهم دلالــــــه***** شوف عيني واشهدوا ياحاضريني

وعبد الله بن حسين بن عسل قتل في اليمن أيام الثورة ، عندما سطا أفراد من إحدى قبائل اليمن على سياراته وهي ذاهبة لصنعا بحملة تجارية ، وكان يرافقهم على ونيت له معه سواقه الدوسري ـ نسيت اسمه ـ حيث قتل ابن حسين ونجا سواقه الدوسري باعجوبة ، وليس لعبد الله بن حسين أولاد ولكن له بنات متزوجات في الرياض ، حسب ماأعرف ولا أدري من الموجود منهم من الذين توفو ا، وأخو ه محمد بن حسين وعياله موجودون الآن في الهدار غرب الأفلاج مع باقي آل عسل .
التفصيل كثير وحاولت الاختصار قدر الامكان

[راعي العوجا]

الله يرفع قدرك يا فهد بن سالم شفيت الغله وبردت على الخاطر وعطيتنا العلم الغانم ..

بمثل ماقلت نبي تصير السوالف ..

[فهد بن سالم]

جزاك الله خير ياراعي العوجا على دعوتك الطيبة

[المتروكي]

حيا الله فهد بن سالم وباقي الاخوان ..

اجل يا فهد بن سالم توافقني بالقصيدة الي ذكرتها انا والفرق بين راشد ابن خر الذيب وعبدالله بن حسين رحمهما الله ..

اضفتلنا معلومات قيمة يا فهد بن سالم لا هنت وبيض الله وجهك ..

ننتظر مشاركاتك القادمه لا هنت ..

مع اطيب تحياتي ..

المتروكي ..

[العميد]

الله يقويك يا فهد بن سالم وما ذكرته هو الصحيح

ولا قصورا في اخواني الذين شاركوا

وهو فعلا عبدالله بن حسين العسل من " الغوانم " الزعبي .