ترحيب للجميع

[الكاشف]

((( للجميع ياسلام الله عليكم ))))

--------------------------------------------------------------------------------

السلام عليكم ورحمة الله وبركاته


وصبحكم الله بالخير







( موال )


يا سلام الله عليكم يا سلام

--------------------- صفو الصفين يا نسل الكرام

بان نور الصبح وانزاح الظلام

------------------- والله الوالي ... ولا غيره ولي


(( سلامي مني والتحيه للجميع **** اقولها والقول يبغا الاستماع ))



وسلامتكم............ ........الكاشف

[الكاشف]

نتمنى المشاركة من الجميع وحياكم الله

.............الكاشف. ...............

[العبيدي]

مرحباً بك يالكاشف

حييت وحيي موالك


صح لسانك

ندعو الاخوة الاعضاء مجاراتك

[محمد فهد الوافي]

السلام عليكم ورحمة الله وبركاته

مساكم الله بالخير جميع ,,,,,,,,,,

الرد__

مرحبا من قبل ما نبدى الكلام
------------------------------------------ عد من صلى لربه واستقام
وعد طير اعتلى جوه وحام
----------------------------------------- والله الوالي ولا غيره ولي

(( يا مرحبا واللي يهلي ما يضيع @@ في منتدى زعبٍ يا محلى الاجتماع ))

وسلامتكم ,,,,,,,,,,

[عبدالعزيز]

يا سلام يا سلام ..


مشاركه رائعه منك اخي الكاشــــف ..

ومجارات ولا اروع من المتألق محمد فهد الوافي ..



اتمنى الاستمرار لكي نستمتع مع المحاوره ..




صح السانكم جميع ..





تحيتي لكم .






.

[مبارك الزعبي]

السلام عليكم .....


مشاركه ممتازه يالكاشف وصح لسانك ابدعت يالجزل ..

-----------

رد جميل منك يابوفهد ..

صح لسانك يالقرم ..

........ واتمنى استمرار المحاوره وانا اعتبروني فالصف :)


تحياتي لكم .

[العبيدي]

ارحبوا

صح الله لسانك يامحمد

بيض الله وجهك

وافي وردك وافي

تسلم

ولاتهون يالكاشف

الى الامام

[ابوهلا]

مرحبا بالكاشف



ومرحبا بمحمد الوافي



ونحن بنتظار المتابعه



لاهنتوا يامبدعين

[عبدالله السلمي]

الاخ /الكاشف
هلابك مرحبابك ومشكور على هذه المشاركه

ولي الشرف بمشاركة الأخوان بالرد عليك


مرحبا والطيب منهاج الرجال

والمعرفه للنشاما راس مال

والبيوت العامره فيها الظلال

والله الوالي ولا غيره ولي

حيالله اللي في مواقيفه شجيع0000إذا لقي فالمعركة رجلٍ شجاع

[محمد فهد الوافي]

السلام عليكم ورحمة الله وبركاته ،،،،،،،،،،،
مساكم الله بالخير

محاورة الشاعر المبدع عبدالله السلمي

الرد

مرحبا واهلا هلا بشاعر سليــم
----------------------------------------- عد ما ذعذع من الغربي نسيم
نعرفك شاعر ولك صيت عظيـم
----------------------------------------- والله الوالي ولا غيره ولــــي

( ابنشدك ياراعي الراي الرفيع *** الملعبه هي هابطة والا برفـــــــــاع )

( اشوف انا كل يبا يصنع صنيع *** خلو مجال الشعر يشكي من الضياع )



وخلوووووووووووووووها ،،،،،،،،،،،،

[العبيدي]

مرحباً ياعبدالله

ومرحبا يامحمد

الان استوت القلطه

الوافي بشرى للمنتدى وشاعر متمكن

وانت ياعبدالله ماتحتاج

اقلطوا يامبدعين

[عبدالله السلمي]

أخوي / محمد الوافي

أولاً: شرف كبير أتحاور معك

ثانياً: أسف على التأخير لأسباب تقنيـــــــــــــــه ...ههههههههههه

ثالثاً: ابدعت يامحمد في طرح موضوع معم في أبياتك الموجهه لي


رابعاً: اســــــــتلم الرد

البقا ياراعي المد الجزيل.....كاسب الأمجاد والعلم الجميل
ماعليكم زود والله يالزميل..... والله الوالي ولا غيره ولي

تسأل وأجاوب وضعها جداً فضيع..........ضاقت بها كل الدروب اللي وساع
كلٍ تعرضهـــا مع الخط الســــريع.........و الفائده لاشي والغايه متــــــــــاع

[محمد فهد الوافي]

السلام عليكم ورحمة الله وبركاته ،،،،،،،،،،

مساكم الله بالخير

مرحبا والله ومسهلا بخوي عبدالله السلمي

الشرف لنا حنا طال عمرك وحنا نحاول مجاراتك وانت شاعر كبير وغني عن التعريف وعارفين ان الرد ما هو عاسرك

صحيح انك طولت بس من طول الغيبات جاب الغنايم وعزالله انك جبت الغنايم بردك الجزل

الرد

المصيبه ماهي بقصة متاع
------------------------------------ المصيبه في معاني ما يذاع
ضيعونا يا ولد والله ضياع
----------------------------------- والله الوالي ولا غيره ولــي

( اشوف انا بالملعبه شي مريـــع *** يجيك شاعرها تقل لابس قنــــــــــاع )
( المشكله في ظاهره حمل وديع *** وفي باطنه وصفٍ كما وصف السباع )

وسلامتكم ,,,,,,,,,,,

[عبدالله السلمي]

والله ماعليك ولاعلى الطيبين زود يامحمد

وأنا الطالب وانت المعلم بارك الله فيك

وكلامك الجميل دليل على تواضع الكبار يالغالي

خلوووووووووووووووها

شاعرٍ يعطيك قطفٍ من ثمر.....وشاعرٍ يعطيك نقشٍ من حجر
وشاعرٍ ودك تقطه بالبحــر.....والله الوالي ولا غيره ولـــي

أناأدري إن الوضع ذا ماهو طبيع..... ماعاد تعرف من هجوم ومن دفاع
تشوف لك عاقل كما الطفل الرضيع....يطب وسط الملعبه من غير داع

[محمد فهد الوافي]

السلام عليكم ورحمة الله وبركاته ،،،،،،،،،،،،،

مساكم الله بالخير

اخوي عبدالله السلمي

كلامك الجميل خلاني اعجز عن الرد بصراحة ما ادري شقول

صحيح معرفة الرياجيل تجارة وانت معرفتي فيك اكبر تجارة

وصدقني مهما حاولت تجامل ماراح التلميذ يتفوق على استاذه وانت بلا شك الاستاذ بل مدرسة شعرية ومنكم نستفيد

الرد

خلووووووووووووها




فيه نقطة يا بن عمي لا تطوف
------------------------------------------- مسألة بيع الشعر سرٍ وشوف
صاربه سوق تباعبه الحــروف
------------------------------------------ والله الوالي ولا غيره ولـــــي

(اشوف انا شعار تشري ثم تبيع @@ والشعر اصبح سلعتن تشرى وتباع )
(الناس دايم مالها اللي يشيـــــع @@ وياكثر مازادت على ماهو يشــــاع )

وسلامتكم ،،،،،،،،،،،

[عبدالله السلمي]

هلا وغلا محمد الوافي

يسعد مساك بالحب والسعاده


خلوووووووووووووووووو ها

أدري إن الامر ذا قاعد يصير......من فئه بالناس مافيهم ظمير
ما لقينا حل للأمر الخطير....... والله الوالي ولا غيره ولي

اللي يبيع إحساسه إنسانٍ صديع.....ماله مكانه مع طويلين الذراع
بكره تبين الشمس والزبده تميع......وتشوف راعين البطون اللي جياع

[محمد فهد الوافي]

السلام عليكم ورحمة الله وبركاته ،،،،،،،،،،،،،،،

مساكم الله بالخير

اخوي عبدالله السلمي

صراحة امتعتنا بردك الجميل ومشكور على التواصل بالمحاورة وانا الحين بنهيها وانت متروك لك المجال
ومخير بالرد او لا واتمنى ان اتواصل معك بالمحاورة في مواضيع اخرى

وتقبل مني اجمل التحية والاحترام ،،،،،،،،،،،،

الرد


انتهى ياصاحبي حلو القصيد
------------------------------------------ بيني وبينك عسى عمرك مديد
استفدنا منك يومنك تفيــــــد
------------------------------------------ والله الوالي ولا غيره ولـــــي

صحيح ابن عتقان كالسد المنيع *** عنده بيوت الشعر طوعها طواع
مع السلامه يابن عمي يالبديــع *** وختامها الله يحفظك والــــوداع


وسلامتكم ،،،،،،،،،،،،،،،

[فهد بن سالم]

الاخ العزيز الكاشف

الاخ العزيز محمد فهد الوافي

الاخ العزيز عبدالله السلمي

بيض الله وجيهكم و ماقصرتوا على المحاورة الجميلة

تابعنا محاورتكم واعجبنا بها

شاكرين لكم ابداعكم

تقبلوا خالص التحية والتقدير







.

[العبيدي]

سلمتوا

بيض الله وجهك ياعبداللة

وبيض الله وجهك يامحمد

ولايهون من شارك في هذه المحاوره

سوا بتعليق او بتشجيع

وفيتوا وكفيتوا

[عبدالله السلمي]

أخي الغالي/ محمد الوافي

يعلم الله كم انا سعيد بالتحاور معك

وأستفدت منك الكثير.واشكرك على تواضعك

يا إبن العم

كما لا يفوتني أن اشكر الاستاذ العبيدي

وكل من أطلع اوعلق على المحاوره