قبايل تسكن بشبه الجزيرة

[العبيدي]

صبحتم ومسيتم بالخير حبيت انقل لكم هذه القصيده

يالله ياخالـق اراضيـن وابحـار **** الواحـد المعبـود رازق عبـيـده

الخالق الغفار علام الاسرار **** وفرق شعـوب الارض فـي كـل يـده

وابدي واسولف من عذيبات الاشعار **** ابيات شعـر والمعانـي وكيـده

اشري وابيع واعرف كيف بختار **** واختار من جزل البيـوت الفريـده

وذ كرتراث وعز وامجـاد وافخـار **** قبائـل تومـن بديـن وعقيـده

وصلت حضارتنا على سطح الاقمار **** ابنا الجزير والجزيـره مجيـده

في ظل حكام لهم فعل واشـوار **** ال السعـود اللـي تفـك الضهيـده

نسل الزعيم الحاكم العـادل البـار **** مجـدد امجـاد الجزيـره بجيـده

حتى اصبحت حره وحنا له انصار **** في ظل اخو نوره هنوف سعيـده

وصارت لابو تركي بطوله وتذكار **** والفخر والامجاد تبقـى شهيـده

وخلف لنا املوك لهم فعل واخبار **** الشعـب واحـد والقيـاده رشيـده

والامن بانينه على ساس وجدار **** وقرو على العابـث عقوبـه شديـده

وحنا حماة الدار من كل غدار **** ومـا همنـا بطشـه وخبثـه وكيـده

قبائل مالحقناهـم اوعـار **** وعشنـا بهـذي الـدار عيشـه رغيـده

والحمد لله نحمده سر واجهـار **** شعـب تكاتـف مـن سنيـن مديـده

ودون الوطن جيش على كل معبار **** لارفرف البيرق ونـادى عقيـده

بشرق البلاد وغربها دوم حضار **** وارض الشمال اللي نفـوده مديـده

وارض الجنوب اللي تخيضر بالاشجار **** جزيرة فيها القبايـل عديـده

ارض بها قحطان وافين الاشبـار **** وياعـز منهـم بالشدايـد بسيـده

واذكر عتيبه يوم للطيب مغوار **** لا ثـارت الهيجـا وقـرب ضديـده

وشمر هل الطولات والجود مقدار **** اهل الكرم واهل الفعـول الحميـده

وقوم اعنزه مروين الاخصام الامرار **** اولاد وايل من عصور عهيـده

ومطير قوم تكرم الضيف لا زرار **** وياويل خصم في حراهم وعيـده

واذكر قبيلة حرب يانعم الاخيار **** وتاريخهم يحكـي سطـور مجيـده

وسبيع نعم القوم ووجيه الاسفار **** زبن الدخيل ليا زبـن مـن طريـده

واذكر قبيلة يام والطيـب ينـدار **** اهـل العلـوم الوافيـه والرشيـده

ثم الدواسر تجعل الخصم منهـار **** عيـال زايـد عـز منهـم سنيـده

ثم السهول اللي لها الطيب مدرار **** وعن منهج العادات ماهـي محيـده

ثم اذكر العجمان حمايـة الجـار **** والمرجلـه والجـاه فيهـم عتيـده

واذكر بني مره طويلين الاعمار **** مـا ينقـد المـري ولا لـه نقيـده

ثم الهواجر لابة تقدح النـار **** اهـل الركـاب اللـي خطاهـا بعيـده

واذكر بني خالد قبيلة وامار **** قوم لهـم فـي المجـد قـول ورصيـده

وبني تميم اللي لها الطيب مصدار **** بنـي تميـم وكـل فعـل تجيـده

ثم الزعوب اللي بها الخصم يحتار **** شجعان ماترضى سـوا ماتريـده

العازمي وافي وفي الطيب بيطار **** روحه على كل المصاعب صميـده

ثم الظفيري في المصاعيب جبار **** والطيب والامداح باصلـه وطيـده

ثم اذكر الاشراف بجلال واكبار **** اهل الحجـاز اللـي تفـك الزهيـده

ثم الهذيلي له مواقف ومندار **** راعي الفخـر راعـي العلـوم السديـده

ثم البقوم اللي لهم جيش وامهار **** ريف الضيـوف ليـا لفاهـم وليـده

واذكر ثقيف اللي لهم مجد وآثار **** ومهما حسبنـا مـن كـلام نعيـده

وبلحارث اهل العز بشهود واقرار **** ا لحارثي ياطيـب فعلـه وجيـده

والمالكي معروف لا صار ما صار **** في موقف اهل الطيب يبذل جهيده

واثني تحياتي عدد وبل الامطار **** علـى سليـم وكـل خصـم تكيـده

واذكر جهينه هل مواقيف وادوار **** تلقى الجهيني راسـم الطيـب بيـده

واذكر بلي والمجدله فعل واظهار **** وتاريخهـم يحكـي فعـول فريـده

وبني عطيه في المواجيب حضار **** قـوم بوقـت الجـد قـوم عنيـده

ثم الحويطي والكرامه له اشعـار **** ثـم الشـراري لـه فعـول مفيـده

ثم الرشيدي في الصعيبات صبار **** على علـوم الطيـب فعلـه يزيـده

وباقي جنوب الدار والقاف مادار **** باقي علـى قلبـي كـلام واشيـده

زهران نعم القوم في وقت الاضرار **** والخصم عينه من لقاهـا سهيـده

والغامدي معروف له عزم واصرار **** راعي المراجل والعلوم المفيـده

وشمران قوم والجمايل لها اطـوار **** وبلقـرن سـم للقلـوب النكيـده

والاكلبي والمحلفي مابعـد بـار **** والحارثـي طيبـه وفعلـه يشيـده

وبني شهر وبني عمر سيف بتار **** قوم علـى الاخصـام نـار وقيـده

والاسمري والاحمري صيتهم سار **** بين القبايـل والمواقـف شهيـده

واذكر عسير الهول ذربين الاذكار **** وابها احتموها فالسنيـن الشديـده

وادهم والصيعر على حد الاقطار **** يحمون حد الدار من اللـي يريـده

وامشي مع الساحل مع جمله افكار **** رسمتهـا والطيـر زان اتغريـده

وانزل على جيزان تاريخ واديـار **** ورجـال فيفـا والقبايـل عديـده

وارجوا العذر واهل المواجيب عذار **** الي نسيته مانذكر فـي القصيـده

الواهبي عدد ابيوتـه بـالادوار **** مـن شاعـر ماشـل قلبـه حقيـده

شهران ربعي هم هل المدح والكار **** واهل الكند واهل السيوف الجديـده

يوم البلد مايامن الزند لاثـار **** زيزومنـا ابـن مشيـط نعـم الوليـده

فالجهل شجعان وفي السلم تجار **** مـن بطـن بيشـه للتهـم لارفيـده

حبيت ابين موقفي بين شعار **** وارجـوا سموحتكـم علـى ذا النشيـده

ماحب انافق واتعنصر تعنصار **** ولا ني باطيع اهـل العقـول البليـده

ما كل من طب البحر قيل بحار **** وما كل من شل الفشق جاب صيـده

فالشعر بستـان بـه ورد وازهـار **** واللـي تعداهـا بيوتـه فقيـده

واقولها في الشعر تكرار وامرار **** ضرف بلا عنـوان يلغـى بريـده

وبعض السوالف له مواقف ومحضار**** وشعر بلا معنـى لـزوم نبيـده

وصلوا على المرسول شفاع الابرار**** محمـد الهـادي وقـدوة عبيـده



منقول

[ابو تركي]

السلام عليكم ورحمة الله وبركاته


اخي الغالي العبيدي


اسعد الله جميع اوقاتك



وتسلم والله على نقل هذه القصيده الرائعه




تقبل تحيات اخوك
ابوتركي

[العبيدي]

مرحبا والله ومسهلا

مشكور يابو تركي على المرور

ولا شكر على واجب

[ابوطلال الحليو]

بارك الله فيك ياالعبيدي على هذا النقل الجميل

تقبل تحياتي

[العبيدي]

مرحبا يابو طلال

شكراً على المرور

[حليو]

الله يعطيك العافية على نقلك الموضوع

تحياتي

[العبيدي]

حياك الله ياحليو

اشكرك على المرور

[ابوهلا]

السلام عليكم ورحمة الله وبركاته

مشاركه جميله يالعبيدي

ولاكنها مكرره من قبل العضو ابن مدلاج والرجاء قبل اضافة اي مشاركه التأكد انها لم تظاف بالمنتدي لكي نتجنب التكرار


http://www.zaub.com/vb/showthread.php?s=&threadid=1500


ولك مني جزيل الشكر والامتنان يالعبيدي

[العبيدي]

ابو هلا

اشكرك على دقة الملاحظة
والحقيقة اني مادريت عنها الا بعد الاضافه

لان المقال موجودمن فتره وانا اردت فقط الفائده والاطلاع لاعضاء المنتدى

وكما ترى ان هناك اعضاء تفاعلوا مع الموضوع

على العموم اسفين